PUNCH Newspaper don para unto di way Buhari and his guys take dey run tins from Aso Rock, and dem don come out with an editorial wey dem tittle “Buhari’s lawlessness: Our stand.” and for di editorial, dem say from now, dem go refer to Buhari administration as regime, and dem go also dey call Buhari by im military rank, as dictator dah year, Maj. Gen. Muhammadu Buhari, instead of President Muhammadu Buhari, to take protest against wetin dem call “autocracy and military-style repression.”
Dem say Buhari don show se “old habits obviously run deep.” PUNCH say dem nor fit fold dia hand dey watch make Buhari regime dey violate human rights dey attack citizens of di kontri. Dem say dem nor fit folo oda pipo dey pretend say Buhari na democrat, so therefore, make make dem kukuma call Major General Muhammadu Buhari (retd).
Dem yarn many tins, about Buhari disrespect for oda arms of government. Dem also mention di way SSS guys take burst court, go rearrest Sowore. Dem say SSS don turn monster under Buhari regime. Dem say Buhari fit still redeem imsef, if he sack SSS DG, like Osinbajo do to former SSS DG, Daura, and free Sowore.
Meanwhile, while Femi Adesina say nothing do PUNCH if dem wan call Buhari Gen. Buhari, base on sign of free speech for di kontri, Buhari oda tori man, Garba Shehu, wey Aisha Buhari say nor dey loyal to Buhari, say PUNCH decision to add general to Buhari name is not only absurd, but unconstitutional. He say PUNCH nor get right to change BUhari title.