Na Fela sing say double wahala for dead body and di owner, di publisher of Sahara Reporters and leader of #RevolutionNow protest, Omoyele Sowore never die, but e dey like se he don already get double wahala, as SSS, aka DSS guys, re arrest Sowore and im co-defendant, Olawale Bakare again for court.
SSS never make official statement to tell us why dem re-arrest Sowore and Bakare, but dem arrest dem again inside court, like commando wey dey go catsh thief, less dan 24hours, after dem be fess free dem. Nor to small drama happen during di process of di arrest, as Sowore lawyers and fans bin try to hold ground.
SSS bin free Sowore, after 124 days inside SSS cell, and di freedome, come after Justice Ijeoma Ojukwu, wey grant dem bail, para give SSS 24hours to free Sowore and Bakare. As di case resume for hearing again today Friday, di judge, bin don already adjourn di case till February next year, before SSS guys arrest. Falana say dem go challenge di new arrest for court.
Sowore for di small interview wey he run with Channels, say SSS threaten to kill, he say dem tell am say he nor go commot from dia office alive, and e dey like se na dah threat dem wan kari out.