Pipo wey dey inside Aso Rock, don continue to insist say nor yawa between we Presido, Muhammadu Buhari and Vice Presido, Prof. Yemi Osinbajo, base on se di Presidency remain one, unto se na one ticket both Buhari and Osinbajo take enter Aso Rock.
Base on di new Economic Advisory Council (EAC), wey Buhari arrange on Monday to take ova work, of how to beta Naija Economy, from di Economic Management Team (EMT), wey Osinbajo bin dey chair, rumour enter town say, di Cabal guys wey dey run tins for Aso Rock, don arrange with Buhari and dem don start to reduce di levels wey Osinbajo get for dis government.
According to one report wey PUNCHng kari, dem say one pesin inside Aso Rock yarns PUNCh on code, say di cabal guys wan punish Osinbajo for some of di tins wey Osinbajo do, wen he dey act as Acting Presido, wey Buhari go London for treatment dah. Di appointment of Walter Onnoghen as CJN and di sacking wey Osinbajo sack Daura as DSS DG, na some of di crimes.
However, bros Femi Adesina, yarn Channels TV say nothing like dat, he say di fact say Buhari make charges, nor mean se yawa dey Presidency, he say di new EAC wey Buhari set up, na to make Naija beta.
Also bros Laolu Akande, wey be Osinbajo tori man, yarn say di fact se Buhari dissolve Osinbajo EMT, nor mean anything, he say di government remain one, Buhari na number 1, Osinbajor na number 2, inside di same Government.