Na dis Naija all of us dey on Wednesday wey The Cable break news say Department of State Services, aka DSS arrest and press Adams Oshiomhole, di national chairmo of APC neck, base on di crisis wey dey inside APC after di party primaries.
According to di gist for Cable, dem claim say DSS arrest Oshio on Sunday for about 9hours, dey ans am kweshun, base on se DSS say dem hear say Oshio kollet kpaje as bribe from some people for di APC primaries. From di gist, Oshio deny say he do anything like dat, wen dem tell am to resign, Oshio hold ground with dem, he tell dem say e beter make dem just kill am danfor im to resign, base on se he nor fit resign, because Buhari dey im back for all di tins wey he do concerning APC primaries.
After DSS free Oshio finish, he enter Aso Rock go report di mata give Buhari, and di news of DSS arrest shock Buhari and he promise to look into di mata base on se Buhari say he nor send dem dah message.
Both DSS and APC don deny say dem nor know wey dis story from dey come, base on se dem nor know anything or hear anything about DSS arresting Oshio.
Meanwhile, Oshio don discharge from Naija go take breeze and charge his phone for anoda country, wey Okorocha and oda APC guvnors nor go fit give am heat.