Naija polis don draw ear warn Tuface say di thing wey dem dey sight from where dem sidun, if Tubaba like make im climb 10story building, he nor go see anything, so therefore, make im cool down make body nor phone am.
Polis cut dis warning give Tubaba yesterday Thursday for Lagos, unto di protest wey Tuface dey plan for February 6.
Tubaba don call on all im fans and other Naijirians including other artist to come out come use dis protest to say ‘NO’ to di bad policy of dis government wey don make hardship full everywhere. Tubaba say im nor fit sidun dey look as ordinary people for di country dey suffer, na why he dey call di protest. He also knell down beg politicians and Labour people say make dem nor try to put hand for dis protest, unto say e nor concern dem, he say make dem go do dem own protest.
But polis don reply Tubaba, dem say no way, dem nor go let am lead any protest unto say dem get info say bag guys go carry di matter for head use cause kasala for di town, so therefore, dem say no protesting. Dem even yarn say if Tubaba wan protest, he suppose come ask for permission from polis, but we still dey wonder which constitution dat law dey. Polis yarn say if Tubaba try protest, dem go arrest am, dat na wen Tubaba go know say truly, “Nothing Dey Happen.”