Guvnor Babajide Sanwo-Olu of Lagos state, on Monday for state House, honour one super policewoman, SP Celestina Kalu, wey be di Divisional Police Officer (DPO) of Ogudu Police Station, base on di act of kindness wey di policewoman show to one guy, Friday Ajabor, wey omila (armed robbers) shot for Ojota.
Di super policewoman, trend for social media, after news break, of how she lead di squad of police guys, wey go rescue Ajabor. Di omila guys bracket Ajabor and try to rob him and im friends, but as dem nor see anything kollet base on se Ajabor, throwey im phone, make dem nor thief am, na so di omila guys para, shot Ajabor for belle. As police reash di place, dem rush di guy go hospital, and di DPO, offer to donate blood to treat di guy, she even deposit up to N400,000 make dem take treat di guy for LUTH.
As Guvnor Sanwo-Olu hear wetin happen, base on se nor be everyday we dey see or hear of Police officer wey do dis type of good tin, he invite SP. Celestina Kalu, give her honour, and also talk say Lagos government go take care of Ajabor medical bills.
He also tell police and oda security guys, for di state, make dem ginger dia swagger and chase bad guys commot from Lagos.