Di National Presido of Pentecostal Fellowship of Nigeria (PFN), Rev.(Dr.) Felix Omobude, for di statement wey he make for Benin city, on Monday, blast federal government and Ministry of Interior, for di law wey go dey bill churches money, to conduct marriage and issue marriage certificates.
Rev. Omobude, yarn say di policy na anti-Christian law against di church, exploitative and plan to take commercialize Christian marriages for di kontri. He say how come di law nor cover traditional and Muslim marriages? Why na only Christian marriages? He say PFN and di church in general, nor go fold hand dey look government, he say dem go fight against di police, according to law.
For una wey nor understand wetin dey happen, Federal Government through Ministry of Interior recently announce say dem go dey charge churches N30,000, as licence for Christian worship centres to fit do marriages and N21,000 for each marriage certificate.