After many hide and seek game, SSS guys don finally arrest Abdulrasheed Maina, di former Chairmo of Pension Reform Task Team, wey dagbo some pension money, dah year.
Nor be small drama happen for Pennsylvania Avenue Hotel, Utako, Abuja, wey SSS guys for arrest Maina. According to SSS tori guy, Peter Afunanya, he say as dem bracket Maina to arrest, na so Maina 20 years pikin, Faisal Maina, bring out pistol, dey form Rambo, di pikin wey be final year student for Canadian University of Dubai, try to resist SSS guys wey con arrest im papa
But base on di gallantry of we SSS guys, dem ova-power di boy, arrest am join im papa. SSS say dem recover pistol with live bullet, bullet-proof Range Rover SUV, BMW car, some foreign money, phantom 7 drone and sensitive documents. Dem say dem do hand dem ova give EFCC, for further investigations.