Di oga at di top for inside Nigerian Army, aka Chief of Army Staff, Lt.-Gen. Tukur Buratai, don dey call we religious leaders to epp we Army with spiritual epp, to defeat boko boys and oda bad guys wey dey threaten security for di kontri.
Oga Buratai yarn dis cry for epp, for di Spiritual Warfare Seminar, “Countering Insurgency and Violent Extremism in Nigerian Through Spiritual Warfare” wey Nigerian Army Directorate of Chaplain Services Roman Catholic, Protestant and Directorate of Islamic Affairs arrange for Abuja, on Monday.
Gen. Buratai wey Maj.-Gen. Mohammed Yusuf, represent, yarn say, we need superior ideology to counter or eradicate boko haram bad ideology, he say na dis wrong ideology of boko boys, dey make boko fighters dey continue to fight, even wen dem know se, Army go kill dem. He say both Pastors and Imams, need to epp, base on se dem need to preach to dia followers to do di right tin.
He say no mata how army continue to kpai boko boys, until di wrong ideology wey dey push dem die, boko haram nor fit die.